நாடு திரும்பியவுடன் பொலிசாரின் அழைப்புக் குறித்து ஆராய்ந்து நடவடிக்கை எடுப்பேன் – கஜேந்திரகுமார்

யாழ். பல்கலைக்கழக மாணவர்களின் விடுதலைக்கான கூட்டமைப்பின் முன்னணிச் செயற்பாட்டாளர்களுள் ஒருவரான தமிழ்த் தேசிய மக்கள் முன்னணியின் தலைவரும், யாழ். மாவட்ட முன்னாள் நாடாளுமன்ற உறுப்பினருமான கஜேந்திரகுமார் பொன்னம்பலத்தை இன்று சனிக்கிழமை விசாரணைக்கு வருமாறு பயங்கரவாதத் தடுப்புப் பிரிவு பொலிஸாரினால் அழைப்பு விடுக்கப்பட்டிருந்தது.நாளை சனிக்கிழமை காலை 11 மணிக்கு கொழும்பிலுள்ள தலைமைக் காரியாலயத்தில் மேற்படி விசாரணைக்கு சமூகம் அளிக்குமாறு நேற்று கொழும்பிலுள்ள அவரது வீட்டுக்குச் சென்ற படைப்பிரிவினர் அழைப்பைக் கையளித்துள்ளனர்.

இந்த அறிவிப்பு நேற்று மாலை அவரது வீட்டில் கையளிக்கப்பட்டபோதும் கஜேந்திரகுமார் பொன்னம்பலம் வெளிநாடு பயணமாகியுள்ள நிலையில் அவர் இந்த விசாரணைக்கு சமூகம் அளிப்பாரா என்பது குறித்து சந்தேகம் தெரிவிக்கப்பட்டிருந்தது.
இது தொடர்பாக கஜேந்திரகுமார் அவர்கள் இன்று கருத்துத் தெரிவிக்கையில், கொழும்பிலுள்ள எனது வீட்டுக்கு நேற்றுக்காலை தொலைபேசி அழைப்பொன்று வந்தது. அந்தத் தொலைபேசி அழைப்புக்கு எனது தாயார் பதிலளித்தார்.
பயங்கரவாதத் தடுப்புப் பிரிவு பொலிஸ் தலைமையகத்திலிருந்து பேசுவதாகக் கூறிய ஒருவர், எனது முழுப்பெயரையும், விலாசத்தையும் பிரதிப் பொலிஸ்மா அதிபர் கோரியதாகக் கூறியுள்ளனர்.
அத்துடன், யாழ். பல்கலைக்கழக மாணவர்கள் தொடர்பில் அறிக்கையொன்று தயாரிக்கப்படுகிறது. அந்த அறிக்கையை என்னிடம் கையளிக்க வேண்டும் என்றும் அவர் கூறியுள்ளார். அதன் பின்னர் எனது தாயார் எனது முழுப்பெயரையும், விலாசத்தையும் குறித்த அதிகாரிக்கு வழங்கியுள்ளார்.
இந்தநிலையில், நேற்று மாலை எனது வீட்டுக்கு சிங்களத்தில் எழுதப்பட்ட அறிவித்தலொன்று வந்துள்ளது. அந்த அறிவித்தலில் 29 ஆம் திகதி சனிக்கிழமை காலை 11 மணிக்கு கொழும்பிலுள்ள தலைமைக் காரியாலயத்திற்கு விசாரணைக்கு வருமாறு எனக்கு அழைப்பு விடுக்கப்பட்டுள்ளது.

நேற்று இரவு நான் அவசர தேவை நிமிர்த்தம் வெளிநாடு பயணமானேன். நான் நாடு திரும்பியவுடன் பயங்கரவாதத் தடுப்புப் பிரிவு பொலிஸாரின் அழைப்புக் குறித்து ஆராய்ந்து நடவடிக்கை எடுப்பேன் என கஜேந்திரகுமார் தெரிவித்தார்.